مشوار عذابنا الأسبوعي إلى سوق الصيد اللي جنب صيرة باء بالفشل.. كنت أطالع وأنازل وأبايع وأراجل لكن ما فيش فايدة.. من فجر ربي وأنا با البج لبيج ( أو با أدبج دبيج، وللتأكد من صحة الكلمة يرجى الاتصال على التلفون حق الفنان الكبير محمد محسن عطروش وهو موجود في الدليل أو بايكون معه بريد التكروني دبليو دوت كوم أت عطروش دوت والله أعلم بس أنا اتخيل انه مابايكونش إلاّ كذا). بلغت أسعار الأسماك في بورصة عدن معدلات خيالية ما قد عهدناهاش من قبل.. كان معي في «المصياد» - أي محل بيع الصيد وهي كلمة تعلمناها من معهد الحديدة العالي لأعالي البحار والأحياء المائية - قلنا كان معي في ذلك اليوم المشؤوم في أسعار الصيد الأخ جلال طالب زميل قديم، والأخ محمد حسن حرسي الذي غاب في جيبوتي سبع سنين أظنها سمان،وقد قلت له : والله سمنت يابن حرسي يبان الدنيا دردبيس في جيبوتي، قال: يا شيخ قول بسم الله الرحمن وما شاء الله الرحمن بعدين لا تمرع علينا.

طيب مله كيف نسوي أيش عاد نأكل؟ قال جلال: أيش باتسوي.. مشي حالك.. سلك الدنيا هكذا تشتي تسليك.. قلت له: اوبه تقول لي صانونة الهواء مايقعش نعيّش شبابنا على صانونة الهواء وكمان نغلق بشيخوتنا عليها. قال حرسي: يا جماعة انتوا أصحاب عدن مكانكم هكذا في شكاء وبكاء.. استحوا على نفسكم قليل أيش هذا مرة صيد مرة بقل مرة بطاط مامعاكم شغل تاني؟ قلت له إلاّ معانا شغل تاني أهم وهو اننا جالسين ليل ونهار نشقي الحكومة الله يصيبها زيما صاب اللي قبلها.. هكذا شوف يا أبو الحراريس استوينا زي المكالف يا صديقي يا صاحب جيبوتي.. قال حرسي: أيش صاحب جيبوتي هذي.. شوف أنا عدني أسيد (يقصد أزيد) منك.. ما لك يا جلال طالب ساكت.. فهّمه من محمد حسن حرسي.. شرح لي جلال نبذة تاريخية عن أمجاد حرسي الرياضية عندما كانوا يصافطوه أصحابه ويسموه دنج دنج أي بينج بونج لأنه كان ينطقها بالتسمية الأولى.. وقال جلال انه كان من أبطال حمل الأثقال ويبز بايجي ستة عشر فراسلة قالها جلال وحرسي ساكت وأنا أتسمع. وتدري كيف - يواصل جلال - بطّل حرسي حمل الأثقال؟ لما خرجت أغنية الفنان الكبير ابوبكر سالم بلفقيه: يا حامل الأثقال خففها شوي ذا حمل ما ينشال عاد النجد قدامه عُسُر وجبال يا مصعب مناله.

كلام يا حرسي كلام طيب مله - سألته - كيف الأحوال عندكم هناك في جيبوتي فوق وتحت وفي حنبلي؟ قال الحمد لله خير الله باسط لا تسأل على جيبوتي قول لي انته كيف الدنيا هنا عندكم؟ أجبته والله قده زيما تشوف معانا حكومة «روفلية» من حق أم الجن ولا هي دارية فينه هذا الشعب اللي تحكمه ولا هي دارية فين زراطه.. قال حرسي: أوف ياشيخ أيش كلام الوساخة هذا تقول زراطه ومراطه هذا الكلام حق الزراط والمراط مش من شغل الحكومات هذا من شغل الهيئات والمنظمات الدولية، قلت: لا يا شيخ قدك باتجدل بالمسئولية على كوفي عنان والعويلة حقه؟ وليش كمان ما تغلق الحسبة وتقول انها من مسئولية الحكومة الامريكية والرئيس جورج بوش؟ وبعدين نحنا ليش معانا مئات المسئولين - بل ألوف مؤلفة - في مجالس ومقاعد وكراسي ومداكي وكوافي وطرابيش وعمائم ومش قادرين يضبطوا صيانة الوطن وأمنه الغذائي والأسعار منفلتة والغلاء يشمل كل شيء من الصيد زيما شفت معي انته والطالبي إلى كافة المواد الغذائية من خضار وفواكه وخلافه.. وكذلك كل اللحوم المحلية والمستوردة ومشتقاتها من دقة وكبدة ولحم زغار ومعاصيب وإلخ.. وآخر زيادة ضربت الدواجن المستوردة بكل أنواعها أما الدجاج المحلي فقده غالي خلقه من يومه.. وبصراحة آخر زيادة تحصل هي هذي اللي قرحت يوم وصولك يعني لا أخفي على جنابك إنك دبور وإلاّ اشمعنى يزيد سعر كل شيء يوم وصولك؟ قال حرسي: تشتي تقول إننا أنا سبب هذي السيادة؟ قلت يمكن برضه النحس احياناً يحدث ويكون له أثر. اتشعتل الأخ حرسي ورفع يديه وهو يصيح هيا روحي لك بلا سلطبة (سلبطة) قده أنا سبب كل شيء؟ والله انكم ناس خايصين وحكومتكم أخيص منكم وإلاّ ما باتقدر تقول بنفسك هذي حكومة روفلية إلاّ وهي فعلاً روفلية من صدق. قلت للأخ حرسي: يعني انته متفق معي في هذا المحور من محاور الحوار أو النقاش. قال: والله أنا حاوش لكن أيش با أقدر أقول غير ما قاله المثل المعروف لأننا أشوف الدنيا هنا معارضة مع حكومة مع مواطنين كلهم يعيشوا في حالة روفلية لما تب التب وغضب الرب، صحيح من قال: «أيش عرفك تفاح يا ربّاح ما أكلتيها!» وطبعاً الأخ حرسي يقصد المثل المعروف الذي يقول: «أيش عرف الرباح أكل التفاح».

وأخيراً قلت: طيب يا أخ حرسي بحكم يعني إنك مناضل سابق ورياضي قديم مافيش أي بصر وإلا نظر؟ لطم حرسي ركبتيه بيديه الاثنتين وهو يقول: آه آح فينك يا خشب لمّا كنا مسامير!